أُمي ...
باكتب وأنا ابكي
ف الورقة الاخيرة
يمكن ف يوم ما عرفت اقول
يمكن أكون معرفش اقول
معرفتش اوصّل حبي فيكي
معرفتش أفسر حاجتي ليكي
معرفتش اقول كلمة حبيبتي
مقدرتش اقول إنك حبيبتي
وايه حبيبه انت أكثر من حبيبه
انتي زي روح ف جسمي
لو تسيبني
يبقى بعدت روحي عني
يبقى سحبوا الورقة مني
ويبقى خلصت امتحاني
وابقى مستني النتيجة
لأنك انتي الورقة الأخيرة
من غيرك انتي حاعيش ف حيرة
ومن غيرك أصلا إزاي حاعيش
لما كنت عايش معاكى
كنت كل صباح باشوفك
قايمة بدري تحضري الفطار
شغاله طول اليوم تملي
م الصبح لحد آخر النهار
عمرك ف يوم ما اشتكيتي
ولا حتى جيتي ف يوم بكيتي
وحتى لو ف يوم بكيتي
بتداري عنا دموع عينيكي
معاكى ..
عمري ف يوم ما حملت هم
ولا شيلت يوم ف حياتي غم
من يومي وانتي بتشيليني
شلتيني جواكي ف شهور ألم
وعشتي معايا سنين محن
لو شيلتك فوق كتافي زمن
عمري ما حاقدر أدفع الثمن
كل ليلية بنام أحلم أشوفك
أرجع أنام ف حضن خوفك
يمكن تكوني مش حاسة بيا
يمكن يكون حد تاني
اقرب ليكي من عينيا
لكنك إنت كل اللي ليا
مش باغير من حد تاني
مش عايزك بس عشاني
المهم اشوفك قدام عينيا
ولا يسحبوش الورقة من إيديا
نفسي أنجح ف امتحانك
لو كتبت كل الورقة عنك
لو حكيت كل لحظة منك
راح أسقط ف امتحانك
مش حلاقي كلمة تكفى
مش حلاقي كلمة تحكي
عن حنانك عن أمانك
نفسي قلبي ينول رضاكي
نفسي ربي يرضى عني ع
قلبي وربي راضي عنك
نفسي تطلع روحي مني
قبل ما يسحبوا الورقة الأخيرة
عشان أموت قدام عنيكي
فترضي عني ....
ليست هناك تعليقات:
إرسال تعليق