البستاني - بقلم الشاعر / طارق السيد

البستانى
مجني عليا وانا البستاني
زرعت حصد يستاني الجاني
مص فى دمي وهد كياني
داس فى كرامتي وشد وداني
وجري وسبقني وراح وشكاني
ليه وليه انا قلت وداني وجعاني
حكموا عليا أعود من تاني
أطاطي فى راسي ]خدم فى الجاني
أنا مجني عليا ليه أخدم جاني
قالوا راحة باله تبدأ بهواني
نمت ودمع الذل فى عيني
أحلم يوم الجاني مايجيني
وفى يوم معلوم قمت من النوم
على ثورة وفيها مليون مظلوم
إللى بتمسك إيده رغيف
واللى ف خيمة ف طرف رصيف
واللى حالف مايعود للضلمة
واللى ماصدق ينطق كلمة
وناس بتنادي تقول يابلادي
أفديكي بعمري وعمر ولادي
وناس فى العز معانا فى حروبنا
قلعت توبها ولبست توبنا
نزلت يزاحم كتفى كتافهم
أهتف صوتي يدوب فى هتافهم
ونزلم خير جنود الآرض
يوفوا الوعد يصونوا العرض
حطوا صدورهم فدا لضهورنا
قاموا بدورهم قمنا بدورنا
كسرنا الخوف وركبنا الطوف
ولقينا النور على مرمى الشوف
علمنا شعوب مظلومة زيينا
ف وسط البحر إزاى عدينا
بعد زماني كتير ماحناني
خلاني أشد ودان الجاني
شديت العزم عقدت النية
تعيشى على طول يابهية بهية
إللى بناكي أصلا حلواني
بناكي زمان يبنيكي من تاني
بقلم طارق السيد