حكومه متقنزحه /بقلم /محمد حجاج

حكومه متقنزحه
حكومه مكسحه
بس ايه متقنزحه
رجلها متجبسه
وعقلها متحجر
لاجابت لها عكاز
ولا عايزه تتغير
وان جبنا لها عكاز
تمشى بيه تتمختر
ولا نجيب لها عقل
بيه تفكر
الدنيا بسرعه طايره
وهى ورا السلحفاه
مش عارفه تتدور
والشعب
يا عينى عليها صبور
صابر صبر الابل والعير
نايم على الحصير
ومستغطى بظل الدور
مستنى منها قرار
وقرار وقرار
تتوحد الكلمه
و نعيش فى امان
وده اول قرار
وتعيش فى استقرار
بلاش دعم
بس ثبت الأسعار
نزرع القمح يكفينا شهور
خلى المكن فى المصانع يدور
وبلاش تغلى الميه والنور
الكل على الكرسى عينه بدور
يا حكومه حققى العداله
دا الدنيا دواره
لا الغنى هيفضل غنى
ولا الفقير هيفضل محسور
عاملى الانسان على انه انسان
مش بهيمه فى ساقيه بتدور
لابتروى ارض
ولا بتسقى دور
ويا خوفى الارض
فى يوم تبور
يا حكومه اعملى
بدستور
واضح صريح
لايلف ولا يدور
ولا ساكن فيه دبور
معشش بين السطور
وبالقانون يقع المحظور
يا حكومه اعملى بدستور
يخلى الجاحد يدخل الجحور
ويعيش الشعب مستور
بقى معقول الفقير
يعالج سيادة المستشار
ولا اللى على كتفه الدبابير والنسور
مش كفايه الغلا اللى حرمنا م السرور
والدولار اللى بيلف ويدور
والخضار اللى بقى مسعور
واللحمه اللى ما بنشوفها بالشهور
والقرف اللى بنشوفه ف المرور
هتلغى الزيت والسكر
ياشيخه عيشينا مره
فى فرح وحبور

بقلم: محمد حجاج