ماحلانا كي كنَا صغار..قلم الشاعر توفيق جباري

***ماحلانا كي كنَا صغار*** ما حلانا كي كنَا ذرَي في الحوما وما حلانا كي كنَا صغار وما حلانا بلمَتنا وضحكتنا المزيانا وياما طرشقنا وشمَينا البوقرعون ونوَار ما شريناش النوار الذابل والمصنوع انَحو من عطايل وادها شرشار وكي كنا في المكتب نقرو سيدي سيدي ونكتبو ببلوما ويتكبَ علينا حبار وياما استعملنا جفَاف نجفَو بيه كتيبا وياما ضوينا بفتيلا وقازا وفنار وياما سهرنا ليالي وضحكنا مجمولين وكانت عامرا بضحكتنا برشا ديار وكان الخير مبزَع فارينا وشعير وكانت طواحينا تخدم ليل مع نهار وياما مشينا لسرَاط نعومو فيه وساعات يحمل ماه يولَي هايج شرشار وياما مخضت يمَا شكوا وشربنا لبنها ما نبيعوشوا ونهدو منو للجار وياما تقلب لينا طقس وبرد وسحاب وبرق يشالي معبَي بالامطار وياما تسوَقنا في الكرَيطا لتاجروين وكبرنا وتفرَقنا كي ولَينا كبار وما نسيتش لكبير بهمَا وجبَا قمرايا ويمَا لابسا ملحفا بحزامها ومتلحفا بزنَار وما نسيتش اهلي وامَاليا وعمري ما ننساهم نايا ولد المحجوبا والكاف نغنَي مع لطيار هكا عشنا وتعاركنا وضحكنا وحمَلنا بعضنا وهاذا تذكرتو وعمري ما ننسى التَذكار وعمري ما ننسى القصبا الكافيَا وركروكي نسمعها وكي يهيج الخاطر قلت اشعار ***** من يوميات شاعر احب الحياة والأرض والوطن ***** الشاعر توفيق جباري(ابن المحجوبة/ولاية الكاف) ****الجمهورية التونسية****