الي امي النائمه
في قبرها
........ كان منايا
تعيشي حبه.......
فاتت سنه واتنين
وانتي نور العين
لسه ريحتك
في الهدوم
لسه قلبك نبضه
بيسد الخروم
وابتسامتك زي ماهي
مركبه ساعة اللزوم
كنا نوصل بيها ولحد النجوم
والملامح هي هيا
حاجه تفتح للشهيه
والا حضنك ياااه عليكي
كان يساع الدنيا ديا
كنتي احلى الناس وغيه
كنتي لقمه وبق ميه
كان في روحك سر يامه
مهما كان وجعك قويه
كنتي ماليه الدار اغاني
كنتي ضله وليل اماني
شمسه بتدفي القلوب
نسمه منها الحيط يدوب
كنتي قمره
لما كان الليل يحوم
كنتي دايما تفرشي في كفك
نجوم
كنا نجري كنا نلعب
لما نتعب نترمي في حضنك
نعوم
لسه ريحتك ماليا دارنا
لسه ريحتك في الهدوم
كان منايا تعيشي حبه
قبل مانموت
م الهموم ..............
اشرف الشناوي
شاعر عاميه
البرامون. المنصوره
ليست هناك تعليقات:
إرسال تعليق