المزونة في 24/07/2024
قصيد بمناسبة مهرجان سيدي عبد العزيز ب مش
وين ما الجّبل
وينْ ما الجّبَلْ شامَخْ وما اسْتَعْــلاشْ شاهد على التّاريـــخ فيهْ نْبَــــشْ
حَضَنْ عَرْشْ عاش عَزيزْ بين أَعْراشْ بْشوشْ وجَهْ في وَجَهْ الوطن ما كَشْ
تربّى عزيــزْ النّفـسْ ما تْطواطاشْ أيّامْ المحِنْ وفْرانْسا والـــــرَّشْ
الــــرّوحْ هانْها والوَطَنْ ما هاناشْ لا خافْ مِنْ طاغي عَليهْ رْعَشْ
مَنْبَتْ ولي صالَحْ نظيـفْ الشّـــاشْ عَبْد العزيزْ مْعَ العَزيزْ عْــــرَشْ
كَالصّقَرْ في راسْ العلالي عـــاشْ صالَحْ وَلي لا زَنْدْقَة لا غَــــشْ
مِالغَرْبْ لَقْصى مْعَ الرّْفاقَة طــاشْ على البِلْ وِصْلو ساكْنينْ عْشِشْ
في ليبيـــا مِتْسَمْيِـينْ أَمْشـــــــــــاشْ وِهْنايْ في تونِسْ يِقولوا مِـــــشْ
عْروشْ وَطّْنو في العِلُو في لَحْراشْ في بَرْ لاطالَـه الجّْدَبْ لا عْطُشْ
لَكِنْ ظَمــايا العِلِـْـم مـــا تَــــرْواشْ كُلْ وين ما تَشْرَبْ تْزيــــــــدْ عَطَشْ
وثَمْ ناسْ كُلْ ما تْلِمّْها قُشْقــــــــاشْ مَهْما عَلو في الوَزِنْ يَبْقوا قَــشْ
ثَمْ ناس ْماتوا الدّهَرْ ما نْساهـــاشْ جْميلْ فِعِلْهُمْ في الذّاكْرَة تِنْقَــــشْ
الِبزْويشْ عايِشْ اِسِمْ ما تِمْحـــاشْ ثالِثْ ثلاثَة في المداعِكْ خَــــشْ
دْخَلْ الجّبَلْ حَنْظَـلْ عَلى لَلْيــــاشْ كانْ سِمْ في جِسْمْ الخَصيمْ نْهَشْ
نهارْ مَعِرْكَة تْلاقـوا نطيحْ كْبــاشْ خَلّى العَـدوا مْقَسَّمْ لْقِـشْ لْقِــــشْ
عَكْس الوَطَــنْ والظّْلُمْ ما طاقـاشْ قَدّاشْ عَّدى مِنْ نهارْ أَغْبَـــــشْ
بْلا صْمودْهُمْ هَالْوَطَنْ ما تْعَلاّشْ ولا بْناشْ في راسْ العَلالي عِشْ
ولا بعيد فرح النّاس ما جاتـــاش ولا بعطر روح الياسمين يرش
لكن العيد اليوم ما يحــــــــــلاش و سكان غزّة طايبيـــــــــن كوش
جواعى تلاعى لا غطا لا فراش في كل ساعـــــة ما خطاش طش
مَعاني الحَياةْ الكُلْ ما ثَمّـــــــاشْ الصّْهْيـــــونْ باتْ يِحِشْ فيهُمْ حَشْ
القَسّــــــامْ قُرْب العامْ ما وَلاّشْ لا رْضَخْ مِنْ بَطْش العَدو لا دْهِشْ
نـــادوا عَلينا الكُلْ ما فْــزَعْناشْ ماتـــوا ظمايـِـــرْنا بْقـــــــوا لِلنَّشْ
كيفْ اللّي صلّى كِ لْما صَلاّشْ الحُكّامْ عِمْيُو والشّْعوبْ طْــــــرُشْ
مِنْ أجِلْ غَــزَّة البالْ ما يَهْناش الدَّمْ في مَجْرى العــــــروقْ كْفِشْ
الشاعر محمد الغزال كثيري
ليست هناك تعليقات:
إرسال تعليق