حتى لا ننسى
**** مرثية زعره ****
يا لندرى شكون فاكرك يا زعره
و عالعيد باقي نهار و نهارين
يا الشامخه يا الواعره يا الحرّه
يا ناقله ميسانهم لثنين
يا العاتيه يا الكادحه في جبالك
و لقلب مطعون بزوز سكاكين
يا شاربه دمّك على المبروك
وجمّل خليفه على لُوخي الحنين
يا اميمه يا الحنانه واش حوالك
و اكبادك الغالين مذبوحين
شكون يدخل عليك يقول آيمّا
وينو فطوري ...حوايجي مغسولين؟
و كيف ترقدي و يجيك النّوم ا زعره
و الذراري ما روحوش ...لتو غايبين
و لشكون تخبزي و تطيبي الشكشوكه
و لشكون تدسّي الالف و لالفين
يا اميمه يا الحنانه كيفو عيدك
و تخليلتك ...و ايديك مقصوصين
وين السواك و الحنّه وينو كحلك
و القلب دم والعيون مطموزين
يا نار قلبي عليك يا الحنانه
و يا حرقتي على شبابنا السمحين
و ناري على الوطن اللي راح خساره
عند الوحوش و ما لقيتش حين
حروفي ضعيفه و ما نقد نعبر
و في الجاش غصه ما بغت تلين....غصه ما بغت تلين ....
زهره الحواشي 2017
من ٠ حرف و دمعة ٠
ليست هناك تعليقات:
إرسال تعليق