. حاولت انساك
حاولت استرجع الماضى
واقولك عاللى كأن مكتوم
فى قلبى اللى صبح فاضى
ومستنيك تزوره. ف يوم
لقيتك يا حبيب ظالم
وعشت حكاية المظلوم
وسلمتك أنا المجداف
وعلمتك أصول العوم
لقيتك ملت للعزال
وداريت اللى كان معلوم
..............................
نسيت الماضى والحاضر
مع الضهر اللى كان حمال
نسيت ومشيت ورا كلامهم
ورحت تدور يمين وشمال
نسيت قلبى وخليته
يدوق من صفة العزال
وخليتنى مابين مرين
مابين الوحدة والأهمال
غريب الوش بين الناس
ما بين الحل والترحال
................................
شكيتك والنجوم شاهدين
على العمر اللى عشته معاك
أشيل وحدى حمول الشوق
تملى لما اكون وياك
واقول يمكن تحس ف يوم
بسكينه وكات سارقاك
رشقت السن فى ضلوعى
وقال قلبى لقلبي فداك
لا جرحى طاب من غيابك
ولا قلبى قدر ينساك
.................................
ياريتك تمسك الريشة
وترسم شكل قلب حزين
ولو سألوك عن الصورة
ياريت متقولش صورة مين
وقول دا قلب صابه الحب
عاش مبدور بقاله سنين
وصاحبه لقاه ولمه بعيد
وضمة بكل شوق وحنين
ووصانى أعيش انسان
وليه تحت الضلوع قلبين
................................
ياريت ترحمنى وتفكر
ترد يا حبى بعد غياب
حاولت انساك ومش قادر
وقلبى اللى صفالك داب
...............................
شعبان البنا
مصر. البحيرة
ليست هناك تعليقات:
إرسال تعليق