......... مسير الجرح يتداوي......
مسير الجرح يتداوي
وترجع ضحكتك دنيا
وتلقى الحلم في كفوفك
وتوصل شطك المرسوم
ويجي الفجر متوضي
يسد الجرح ويصلي
بكل خشوع
يدق الصبح باب روحك
ويرمي الغنوه فتنبت
وتطرح توت
وقلبك يرمي في جناحه
على الملكوت
يغربل حزنك الماسخ
عشان ماتفوت
ويلم في كل اوجاعك
ويجيب الشمس من طوقها
وكام نجمه كمان فوقها
ويرميها من الشباك
فترسم بيها ايامك
وتندهلك من الأموات
يدق القلب من تاني
وتلقى الدنيا تتبسم
تعدي وتلقى مية غنوه
في حضنك. تجري وتبات
مسير الجرح يتداوي
مادام لسه الامل حلقات
وروحك لسه بتغني
على النغمات.
....................
اشرف الشناوي
شاعر عاميه
البرامون
المنصوره
ليست هناك تعليقات:
إرسال تعليق