يا ڨلبي وصّيتك إسمع الكلام
و قتلك خلّي أمرك للعــڨــل
تصير مرتاح من الهم و التخمام
و كل المشاكل المخبّلة تتحل
تتسرّح حرير تمام بتمام
و كل مشكلة ملزوم ليها حل
الحلفة ما إطيب كان بالرزام
أضفرها و ردها في مقاس حبل
الهم قد ما يتكدّس أكوام
و قد ما يعتال مثيل جبل
و يصير عملاق بكبر لحجام
و من بو ڨرنين ع الشعانبي يطل
يجيه نهار ينجلي و يقزام
و يصير تحت لقدام يتذل
وصيتك ما تخالط الأقزام
قلال الهمّة في جود التل
و ديما خالط كبار لقوام
تنال منهم حكمة و مثل
و باريك من كل خوّان و مسمام
و كل من ساسه خايخ فيه حول
الطيور فيها البارك و الحوّام
لكن أغلبها طعام صڨور مبجّل
و الحوت الكل في بحره عوّام
و فيه أنواع كثيرة و شتل
لكن على الميزان أسوام
و الكيلو عمره ما يكون رطل
بقلم حاتم بن حورية ######
ليست هناك تعليقات:
إرسال تعليق