للامهات الغائبات الحاضرات في قلوبنا
--------------------------------------------
عيوني ابواب الحلم طلي اضهري فيها
غيرك ماضني حدا جروحي بيداويها
من قبل مده وزمن شفتك بجنب الباب
وما قدرت من فرحتي الدمعات اخفيها
انْدهتك يا أمي تعي دخلك بيكفي غياب
ضلوعي ما قبلت حدا غيرك يدفيها
وحامل بقلبي الشقاء مع لهفة الغياب
وما عدت قادر نيران الشوق اطفيها
شمع ال بعيدي شهق ومثلو فؤادي ذاب
وناطر ليالي العتم نورك يْضويها
ومهما يا أمي كبرت وشعر ال عراسي شاب
حروف ال باسمك ع ثمي بضل كاغيها
وياما ع خد البدر شفت الدمع منساب
يرسم حروف وصور واقعد تاهجيها
ومع بعض نغفا بأمل ونسكر الاهداب
ورقة حكايا وبايدو الدهر طاويها
وبكره ان رجعتي معي بفتح فؤادي كتاب
وبقراء حنيني جُمل حافظ معانيها
ولو كان جمله انتست او حرف منها غاب
بسمع نهيدك يا أمي عم بيكفيها
-----------------------------------
بقلمي راضي مشيلح
ليست هناك تعليقات:
إرسال تعليق