بنوتة رقيقة...من كلماتى يارب تنال إعجابكم ...
تحياتى القلبية للجميع
---------------
روحى دايماً وياك مخطوفة
ومشاعرى فى حبك ملهوفة
وبحبك لكن جوايا...
بنوتة رقيقة و مكسوفة
أنا وردة فى إيدك بتفتح
إسقيها حنان الهوا تطرح
شوق يروى قلوب كل العشاق
ويدّوب ميت مليون مشتاق
من قلبى دعيت وأهو ربنا شاء
وياك ومعاك يا حبيبى أفرح
الدنيا معاك مش سيعانى
وسعادتى للسما وخدانى
مش عارفة لفين..وشمال ويمين
غير عينك مش شايفة مكانى
فى الحب حبيبى أنا تلميذة
ويدوبك بأبدأ وأتعلم
أنا عايشة حاجات حلوة لذيذة
والقلب فى إيدك و مسلّم
طمنى وقرب منى..
وخدنى بكل حنان ضُمنى
حسسنى غلاوتى وقيمتى
وقولى كلام حلو يهزنى
خلينى أطير م الفرحة
ويا الفستان والطرحة
فى الجية معاك والرايحة
أقول للدنيا حبيبى..
بحبه وبيحبنى
بقلم الشاعر /صبرى أبوطالب
ليست هناك تعليقات:
إرسال تعليق