زجلية تحت عنوان :
راجع***
راجع
ذيك الطبايع العامرة غش
دفوع كبير التبوحيط والفش
راك ف لبهوت جمعتي سبع صنايع
الصورة الملفقة وقسوة الوحش
لْساعي القيل وتزعريطة الدحش
اوهام الحال وخْرافتها ولمواجع
الكنه المخفي
نادَر تْبَن بالطين مطلي
مظلمة سماك ...
حاير ضايع
حجرة عاد لقلب والنخوة جف وادها
لْبَية حَلْفت إيلا حَرْنَت كْبادها
رابت الخيمة ...
تنخرو عمادها وكلها فين دالع
دوًن على اللوح بشهدة الزهرة
النجوم الساهرة وَدْفا الكَمرة
نقش بالحرف دربك ...
وبالصفا والنقا هدم لموانع
والطايع الصايع
ثوب الذلة لبسو
عبثي عايش ميت حسو
محلب فمو بالقبح ...
ما صفى ما شرب ما جاد ما عاد نافع
ربطو الخوف بحبال الحيرة
في الشر يدو ممدودة وفي لخير قصيرة
مخو حافي مشوك ...
ولذيك الطبايع حلف إيلا يراجع
راجع
نفسك وسقسي لمرايا
على ذاك الوداد ل صَدًى ولمحبة ولعطايا
عدمي وليتي...
ولشيطانك ساجد راكع ؤ ف حق لغير طامع
تمساح دامع
يضغضغك بِ نيابو مخلوق جايع
يعريك واخا لكثير خالعو يعود لفقرو...
وهو ليه راجع راجع
ما ركع لله باش يفهم الدنيا
ؤلا نقى دواخلو وصفى النية
حولو جهلو مدحور ...
مجهول وفي التشلهيب شناق بايع
راجع
فذيك الحطة العالية ما هي ليك
فاقد الشي راه ما يعطيه ما يْرَقع شُبيك
تزيد تَهْتر لَحْوال ...
ها لعوافي وها قبح الطبايع
راجع
لغا باك صاحبي والانا
سقي نظراتك ب لوفا تزيان ارضنا وسمانا
خلي لخير يغني بغناه ...
ما تدنسو ما تلطخو
وعلى خوك ما تْكَرْكر مْواجع
راجع
طبع الحيوان وتلقح بالإنسانية
كون سبع في الصدق ؤ عفط على الببغائية
خرج من المستفهم...
تحرر من قظبانو وسلالو
راك في الخلف مربوط قابع
راجع
******الشاعر والزجال: أحمد الكندودي ***المغرب
ليست هناك تعليقات:
إرسال تعليق