ليله بكى فيها القمر
غنوه الشاعر
السيد الشهاوي
عيون حبيبي...بكت
وبكي عشانها القمر
حتي النجوم اختفت
بين السحاب والمطر
والليل حزين ومستني
لحظة طلوع الفجر
******
ياللي إنت كل المني
يا عمر عمري.. يا انا
كان نفسي بس أسألك
قبل الوداع: مين انا
بالنسبة لك.... إيه غيرك
مش قصدي الومك
ولا قصدي احيرك
آنا قلت بس...افكرك
كان لينا و يا الربيع
عهد ووعد
نتقابل وتروي بايدينا
الزهور والورد
*****
ياما لعبت الأيام بينا
وباعت واشترت فينا
وكنت إنت.....وكان حبك
اكبر من قسوه ليالينا
وكان الجرح في قلوبنا
بتشفيه همسه أو كلمه
أو حتي النظرة في عيونك
وعشنا عمرنا كله
كأنه كان ليله
من الف ليله وليله
*****
جيت أسألك عن حبنا
إزاي هان عليك
لقيتك بكيت وياريتني
ما سالتك ياريت
ارتعشت بين ايديا ايديك
بكت العيون الجميله
وبكت النجوم في السماء
وبكي عشانها القمر واختفي
والشمس غابت وغاب الضي
علشان عيون حبيبي
مالهاش في الدنيا ..زي
اقوي من ظلم الليالي
واقوي من غدر البشر
وعلشان كده
بكت عيون القمر
كلمات/السيد الشهاوي
ليست هناك تعليقات:
إرسال تعليق