ساعات الخوف يكون أكبر
من اي حروف
ساعات بنشوف صور فادحه
و ننكرر إننا بنشوف
و نكره حتى نتكلم و لو موتنا
فنتعود على سوكتنا
و يصبح صمتنا مألوف
نطوف بقلوبنا حب كبير
و نتحايل على اللي يحن
نعود و الفرحه سر في بير
بأحلام عجزت في السن
و مين يوقف سواقي العمر
ما دام بتلف ع الفاضي
نبات نستنى على بابها
عشان يفتح مهوش راضي
بكيت من صدمتي فيها
و أكبر صدمتي في نفسي
صحيح كان نفسي أرضيها
و أبدي لها عميق آسفي
عن الحلم اللي متحققش
عن الواد عاش حريف
و يلعب حلو و ميكسبش
بحبك قد جبل الخوف
ما وقع كل زواره
بحبك قد حر و قال
كلام هدد أمان داره
بحبك زي كلمة حق
يا نور وسط الظلام يتشق
و يتفرع هنا و هناك
يا إيد متعلقه بشباك
و بتنادي على ( زينب )
و بتصلي على المختار
أنا بين البينين محتار
أخاف و لا امشي في طريقي
الشاعر_فهد_الحوتي
ليست هناك تعليقات:
إرسال تعليق