احكيلي:
..
احكيلي عاللي يفرحني
واحكيلي عاللي امبكيك
نحبك يلغالي تصارحني
لو كان جيت عزيز عليك
..
احكيلي ما تخبي عليا
فرغ قلبك ما يهمكشي
أنت راك ممو عينيا
حزني وحزنك ما يفرقشي
تنزل دمعة بين ايديا
تلقى حضن الي يواسيك
تعرف حضني ليك شوي
لو كان جيت عزيز عليك
...
احكيلي عالدنيا شنيه
مخيبها كالعجلة تدور
مع بعضنا نلقاو ثنيه
ليام مع بعضنا تسير
تجمعنا..تفرقنا الدنيا
عمرها لا تنسيني فيك
ميسالش كي تفكر فيا
لو كان جيت عزيز عليك
....
جرب مهما يكونو أصحاب
في هالوقت شكون يشيلك
تعلًم فرق و اقرا احساب
الي يخونك والي يصونك
مهما نويت عملت ثواب
ربي وحده الي يجازيك
من هالمله راسي شاب
نحكيلك ما نوجع فيك
ما تحسبشي لكل أحباب
لو كان جيت نعز عليك...
...
كانك حاسبني من الناس
البراني يكذّب و ينسي
والا غاب عني الاحساس
والا جناحي ما يطيرشي
خوذ طريق الي محاذيك
ممكن حرفي ما يعبرشي
وهذا جوابي مني ليك
افهم قصدي ما تندمشي
تلقاني ما بين ايديك
لو كان جيت عزيز عليك ...
....
ليلى_السليطي
ليست هناك تعليقات:
إرسال تعليق