حلم مرهون
يا ويلي من غضب الدّحنون
إيدي ع اوراقو بتمون
بحبّني..
ما بحبّني..
ورقة بتضوّي
ورقة حلم مدفون
قطع قدّامي العمر
فِضْيِتْ الحقلة
من روح العطر
ما بقي ولا وردة
بحبّني ..
ما بحبّني ..
النّصيب
بعلم الغيب مكتوم
العين عا حقلة الجيري
بلكي مزهّر عندن الدّحنون
بتسرق إيدي شميلة
ورقة تنطح ورقة
بحبّني ..
ما بحبّني..
ياي الهوى شو ملعون
سمعت الجارة للجارة بتقول
ما طلّق بعدو العزوبيّة
نظراتو عنّا عالدّار
ضربات قلبو جنونيّة
يا خوفي ..
يدقّ الباب عالعكّاز
و ع اكتاف العمر
تشيب الخبريّة
وما يبقى بالبال
ولا دحنونة
جميلة مزرعاني
لبنان الجنوب
ريحانة العرب
إلى عشّاق اللغة المحكيّة لتزايد الطلب
ليست هناك تعليقات:
إرسال تعليق