في حاجة ال نسمة حرّيّة
عندي مــدّة انـطارد فيها..
وطني قلّـي صعيب شويّة
رياح الخوف قضت عليها..
والبلـبل ما عـاد يغنّي
لاهو مـرتاح و متهنّـي
من سربه غاضب كاينّي
حـتى جناحاته راخيها...
انحسّه صورة ونسخة منّي
امأيّس و الفرحة ناسيها...
في قلبي غصة وجروح
تاعب ضايق وين ارّوح
شوارع وطني بلاشي روح
سودة وطويلة لياليها..
لا حلمة ولا ضيّة اتلوح
واحزاني متلحّف بيها...
يا شمس الحرية ولّي
ويا قمرة لا تغيب وهلّي
يا نجمة شعشع لا تفلّي
ملزوم الارض اتضوّيها...
يا نسمة هبهب لا تكلّي
وكان عندك كلمة ڤوليها...
محمد القاسمي
ليست هناك تعليقات:
إرسال تعليق