فارقني هواك
القلب معاك يا للاّ البيّة
بلادك زادت في مبهاك
هاو ربي خلاك مهنيّة
وسيد الرجّالة هاهو جاك
بخنوق ومحرمة زهرية
ع الراس قداش واتاك
لابسة خلايل ذهبيّة
وقفطان يسحر محلاك
يا العاشقة يا التونسيّة
عقلك زينة كيف حلّاك
أنت الأم وأنت البنية
جنّة الدّار و هذا باباك
في عيدك يعطيك هديّة
وكي تقرى يصونك يرعاك
طبيبة وأستاذة جمليّة
وفنانة يخطف بهواك
تبارك الله عليك صبيّة
كلامك زين كيف علاّك
تخطف الأنظار مقديّة
زهرة في جنينة جدّاك
تكتب الأشعار وصيّة
ومتخافش م الظلام حلاك
أنت اللّي ربّاتك مڨديّة
تركب الأهوال وما تراك
تحطّك في القلب تكيّة
وفي ممّو العين تلقاك
في عيدك ألفين مطيّة
فارس فوق الخيل هواك
يراك أنت أحلى شنتيّة
ويتمنّى يخوزك يرعاك
يا بابا أعطيني هديّة
ما تفارقني راني ضناك
طول العمر ليك وليّة
والمستقبل ممدود وراك
يا بنتي يا للاّ البيّة
عمري والله ليك فداك
نحبّ نشوفك متهنّيّة
وفارس عمرك يلڨاك
دمعة عيني على خدّيّ
هذا العيد فارقني سماك
الشاعرة حميدة بن ساسي
ليست هناك تعليقات:
إرسال تعليق